3/3 Njia ya Mkutano wa Kikundi

Kundi la 3/3 ni kundi linalogawa muda wake pamoja katika sehemu 3. Muundo huu huzingatia uaminifu kwa maelekezo ya zamani ya Bwana, kumsikia Bwana pamoja, na kupanga kutii katika siku za karibu kwa mwongozo wowote ambao Bwana atatoa.

Muundo huu wa 3/3 unaweza kutumiwa kwa kanisa rahisi (au kanisa la nyumbani), Kiini cha Uongozi, au Kikundi cha Ushauri wa Rika.

Hivi ndivyo unavyofanya kazi:

• ANGALIA NYUMA - Sehemu ya kwanza ya muda wa kikundi hutumika kuangalia yale yaliyotokea tangu walipokutana mara ya mwisho.
• TAZAMA JUU - Sehemu ya katikati ya muda wa kikundi hutumika kutazama juu kwa ajili ya hekima na mwongozo wa Mungu kupitia maandiko, majadiliano, na maombi.
• TAZAMA KWA MBELE - Sehemu ya mwisho ya muda wa kikundi hutumika kutazama mbele jinsi kila mmoja atakavyotumia na kutii yale aliyojifunza.

Muhtasari wa Mkutano wa 3/3

ANGALIA NYUMA [1/3 ya muda wako]

Utunzaji na Maombi: Tumia muda kila mtu kushiriki jambo moja analoshukuru kwa ajili yake. Kisha kila mtu ashirkishe jambo moja analopambana nalo. Mtu aliye upande wake wa kulia amwombee kuhusu mambo aliyoshiriki. Ikiwa mtu yeyote anapambana na jambo linalohitaji uangalizi zaidi, bakini baada ya mkutano ili kumtunza mtu huyo.

Maono: Tumia muda kuimba pamoja na uunganishe maneno ya nyimbo na mada za kumpenda Mungu, kuwapenda wengine, kushiriki Yesu na wengine, kuanzisha makundi mapya, na kuwasaidia wengine kufanya vivyo hivyo. Badala yake, watu wanaweza pia kushiriki vifungu vya Biblia vinavyoonyesha mada hizo.

Ukaguzi: Kila mtu ashirkishe jinsi alivyoendelea kuhusu ahadi alizoandika kutoka wiki iliyopita:

• Umetii vipi yale uliyojifunza?
• Umefundisha nani yale uliyojifunza?
• Umeshirikisha nani hadithi yako au Hadithi ya Mungu?

Ikiwa walisahau kutekeleza ahadi au hawakupata nafasi ya kufanya hivyo, basi ahadi za wiki iliyopita zinapaswa kuongezwa kwenye ahadi za wiki hii. Ikiwa mtu anakataa tu kutii jambo ambalo ni wazi alilisikia kutoka kwa Mungu, basi hilo linapaswa kushughulikiwa kama suala la nidhamu ya kanisa.

TAZAMA JUU [1/3 ya muda wako]

Omba: Zungumza na Mungu kwa urahisi na kwa kifupi. Mwombe Mungu akufundishe kupitia kifungu hiki.

Soma na Jadili: Soma kifungu cha wiki hii. Jadili maswali yafuatayo:

• Ulipenda nini kuhusu kifungu hiki?
• Ni jambo gani uliloliona kuwa gumu au changamoto kuelewa katika kifungu hiki?

Soma tena kifungu cha wiki hii.

• Tunaweza kujifunza nini kuhusu watu kutoka katika kifungu hiki?
• Tunaweza kujifunza nini kuhusu Mungu kutoka katika kifungu hiki?

TAZAMA KWA MBELE [1/3 ya muda wako]

Tii. Fundisha. Shiriki. : Chukua angalau dakika tano katika maombi ya kimya. Kila mtu katika kikundi aombe kwamba Roho Mtakatifu amwonyeshe jinsi ya kujibu maswali haya, kisha afanye ahadi. Kila mtu aandike ahadi hizo ili waweze kuwaombea watu kwa uelewa na kuwajibishana. Huenda wasisikie jambo linalohusiana na kila swali kila wiki. Wanapaswa kutaja ikiwa wanashiriki jibu ambalo hawana uhakika kama walilisikia kutoka kwa Mungu, lakini wanaona linaweza kuwa wazo jema, kwa sababu uwajibikaji katika hali hiyo utashughulikiwa kwa kiwango tofauti.

• Nitaitumiaje na kuitii sehemu hii?
• Nitafundisha nani au nitashiriki na nani kuhusu sehemu hii?
• Mungu anataka nimshirikishe nani hadithi yangu [ushuhuda] na/au Hadithi ya Mungu wiki hii?

Mazoezi: Katika vikundi vya watu wawili au watatu, fanyeni mazoezi ya yale mliyokubali kufanya katika swali la 5, 6, au 7. Kwa mfano, igizeni mazungumzo magumu au jinsi ya kukabiliana na jaribu; fanyeni mazoezi ya kufundisha kifungu cha leo, au fanyeni mazoezi ya kushiriki Injili.

Ongea na Mungu: Katika vikundi vilevile vya watu wawili au watatu, mwombee kila mshiriki mmoja mmoja. Mwombe Mungu aandae mioyo ya watu watakaosikia habari za Yesu wiki hii. Mwombe awape nguvu na hekima ya kuwa watiifu kwa ahadi zao. Huu ndio mwisho wa mkutano.