tool

خُوشخبری نُوں سُناؤن دا طریقہ

ایہہ صفحہ شیئر کرو

خُدا دی کہانی سُناؤن دے بڑے طریقے نیں۔ سب توں ودھیا طریقہ اوس بندے تے منحصر اے جیہنُوں تُسی کہانی سُنا رہے او، تے دُنیا بارے اوہدے وچاراں تے اوہدی حیاتی دے تجربیاں تے۔ رب سوہنا سُناؤن لئی تیار دِلاں نُوں اوہناں دِلاں تے کم کرن لئی ورتدا اے جیہڑے سُنن لئی تیار ہون۔ خُدا دی کہانی سُناؤن دا اِک طریقہ اوس سارے ماجرے دی وضاحت کرنا اے جو کجھ خُدا دی تخلیق توں لے کے ایس زمانے دے اخیر تے اوہدی عدالت تک ہویا۔

خُدا دی کہانی: تخلیق توں عدالت تک

خُدا نے اِبتدا وِچ، دُنیا تے ایہدے وِچ دیاں سب شَیواں بنایاں۔

اوہنے پہلا مرد بنایا تے پہلی عورت بنائی۔ اوہناں نُوں اوہنے اِک سوہنے باغ وِچ رکھیا۔ اوہنے اوہناں نُوں اپنے ٹبر دا حصہ بنایا تے اوہناں دے نال نیڑے دا رِشتہ رکھیا۔

اوہنے اوہناں نُوں اجیہا بنایا پئی سدا ای جیوندے رہن۔ اوتھے موت دا کوئی ناں تھاں نہیں سی۔ ایڈی ودھیا تھاں وِچ وی اِنسان نے خُدا دا حُکم توڑ دِتا تے دُنیا وِچ گُناہ تے مصیبت لے آیا۔ خُدا نے اِنسان نُوں باغ وِچوں کڈھ دِتا۔ خُدا تے اِنسان دے وِچ جیہڑا رشتہ سی اوہ ٹُٹ گیا۔ ہُن اِنسان نُوں موت دا ساہمنا کرنا سی۔ کئی سو ورھیاں تائیں خُدا دُنیا وِچ نبیاں نُوں گھلدا رہیا۔ اوہ اِنساناں نُوں اوہناں دا گُناہ یاد کراؤندے تے نال رب سوہنے دی وفاداری تے دُنیا وِچ اِک نجات دہندہ گھلن دا اوہدا وعدہ وی دسدے رہے۔

اوہ نجات دہندہ اوس نیڑے دے رشتے نُوں بحال کرے گا جیہڑا خُدا تے اِنسان دے وِچکار سی۔ نجات دہندہ اِنسان نُوں موت توں بچاوے گا۔ نجات دہندہ ابدی حیاتی دیوے گا تے سدا اِنسان دے نال رہوے گا۔ رب سوہنا ساڈے نال اجیہا پیار کردا اے پئی جدوں ویلا پُورا ہو گیا، تے اوہنے اپنے پُتر نُوں گھلیا تاں جو اوہ نجات دہندہ بنے۔

یسوع خُدا دا پُتر اے۔ اوہنے دُنیا وِچ کنواری مریم دے راہیں جنم لیا۔ اوہنے اِک کامل زندگی گزاری۔ اوہنے کدی کوئی گُناہ نہیں کیتا۔ یسوع نے لوکاں نُوں خُدا دے بارے تعلیم دِتی۔ اوہنے اپنی وڈی قُدرت وکھاؤندیاں ہویاں بہت سارے معجزے کیتے۔ اوہنے بہت ساریاں بدرُوحاں کڈھیاں۔ اوہنے بہت سارے لوکاں نُوں چنگا کیتا۔ اوہنے انھیاں نُوں نین دِتے۔ اوہنے بولیاں نُوں سُنن دی قوت دِتی۔ اوہنے لنگڑیاں نُوں ٹُرن جوگا کیتا۔ خُداوند یسوع نے تاں مُردے وی زندہ کر دِتے۔ بہت سارے مذہبی آگو یسوع توں ڈردے سن تے اوہدے نال حسد رکھن لگ پئے۔

اوہ چاہن لگ پئے پئی اوہنُوں قتل کر دِتا جاوے۔ کیونجے اوہنے کدی کوئی گُناہ نہیں کیتا سی، یسوع نُوں مرن دی کوئی لوڑ نہیں سی۔

پر اوہنے ساڈے سب لئی قربانی بن کے مرن دا راہ چُنیا۔ اوہدی درد ناک موت نے اِنساناں دے گُناہواں نُوں ڈھک لیا۔ ایس توں مگروں خُداوند یسوع نُوں قبر وِچ دفن کیتا گیا۔ رب سوہنے نے خُداوند یسوع دی دِتی ہوئی قربانی نُوں ویکھیا تے قبول کر لیا۔ رب سوہنے نے خُداوند یسوع نُوں تیجے دِن مُردیاں وِچوں جوا کے اپنی قبولیت ظاہر کیتی۔

خُدا نے آکھیا پئی جے اسی ایمان لے آئیے تے ساڈے گُناہواں لئی یسوع دی قربانی نُوں قبول کریے -- جے اسی اپنے گُناہواں توں مُنہ موڑ کے خُداوند یسوع دے مگر ٹُر پئیے، تے خُدا سانُوں ساڈے سارے گُناہواں توں پاک کر دیوے گا تے اپنے ٹبر وِچ دوبارہ جی آیاں نُوں آکھے گا۔

خُدا اپنے پاک رُوح نُوں گھلدا اے تاں جو اوہ ساڈے وِچ رہوے تے سانُوں یسوع دے مگر ٹُرن دے قابل بناوے۔ اسی ایس بحال ہوئے رشتے نُوں ظاہر کرن تے اوہدے اُتے مُہر لاؤن لئی پانی دا بپتسمہ لیندے آں۔

ساڈا پانی وِچ غوطہ ساڈے مرن تے دفن ہون دی علامت اے۔ تے ساڈا پانی وِچوں اُٹھ کھلونا نویں زندگی دی علامت اے پئی اسی خُداوند یسوع دے مگر ٹُرن لئی جیوندے آں۔

جدوں خُداوند یسوع مویاں وِچوں جی اُٹھیا تے 40 دِن زمین تے رہیا۔

خُداوند یسوع نے اپنے پیروکاراں نُوں تعلیم دِتی پئی ہر تھاں جاؤ تے پوری دُنیا دے لوکاں نُوں اوہدی نجات دی خُوشخبری سُناؤ۔ خُداوند یسوع نے آکھیا - جاؤ تے ساریاں قوماں نُوں شاگرد بناؤ، تے اوہناں نُوں باپ تے بیٹے تے پاک رُوح دے ناں تے بپتسمہ دیو؛ تے اوہناں نُوں تعلیم دیو پئی اوہناں ساریاں گلاں تے عمل کرن جِنہاں دا میں تہانُوں حُکم دِتا اے۔ تے ویکھو! میں دُنیا دے اخیر توڑیں سدا تہاڈے نال آں۔

فیر خُداوند یسوع اوہناں دے ویکھدیاں ویکھدیاں آسمان تے اُٹھا لیا گیا۔ تے اِک دِن، خُداوند یسوع ایسے طراں فیر آوے گا جیویں اوہ گیا سی۔ جیہڑے لوک اوہدے نال پیار نہیں کردے تے نہ اوہدے حُکماں تے چلدے نیں اوہناں نُوں اوہ ہمیشہ دی سزا دیوے گا۔ تے جیہڑے اوہنُوں پیار کردے تے اوہدے حُکماں تے چلدے نیں اوہناں نُوں ہمیشہ لئی قبول کرے گا تے اجر دیوے گا۔ اسی نویں آسمان اُتے تے نویں زمین اُتے سدا اوہدے نال رہواں گے۔

خُداوند یسوع نے میرے گُناہواں کارن جیہڑی قربانی دِتی میں اوہدے تے ایمان رکھدا/رکھدی آں تے اوہنُوں قبول کیتا اے۔ اوہنے مینُوں پاک کر دِتا اے تے بحال کر کے خُدا دے ٹبر دا حصہ بنا دِتا اے۔ اوہنُوں میرے نال پیار اے تے مینُوں اوہدے نال پیار اے تے میں اوہدی بادشاہی وِچ سدا اوہدے نال رہواں گا/رہواں گی۔ رب تہانُوں پیار کردا اے تے چاہندا اے پئی تُسی وی ایس نعمت نُوں حاصل کرو۔ کیہ تُسی ہُنے ای ایہہ حاصل کرنا چاہو گے؟

خُوشخبری دی ایس پیشکاری دی اپنے طور تے اوس ویلے تک مشق کرو جدوں تک تُسی کہانی سُناؤن وِچ سوکھا محسوس نہ کرو۔

اپنے آپ توں پچھو

  • کیہ تُسی ایہہ کہانی زبانی سُنا سکدے او؟ مشق نال ہر کوئی خُوشخبری دی کہانی سُناؤن وِچ بہتر ہو جاندا اے۔ ہُنے رُکو تے 3 واری مشق کرو۔
  • ایس کہانی توں تُسی بنی نوع اِنسان دے بارے کیہ سیکھدے او؟
  • خُدا دے بارے کیہ سِکھدے او؟
  • تہانُوں کیہ لگدا اے کہ ایس طراں دی کہانی سُنان نال تہانُوں خُدا دی کہانی سُنانی سوکھے لگے گی یاں اوکھی؟

اج ہی زُومی ٹریننگ شروع کرو

ایہہ مکمل طور تے مفت اے، تے تُسی کِسے ویلے وی شروع کر سکدے او—جتھے وی او، اپنی رفتار نال چلو۔

مُفت رجسٹر کرو