concept

بطخ دے چُوچے دی شاگردی - پہلے ہتھ قیادت

ایہہ صفحہ شیئر کرو

کیہ تُسی جاندے او پئی بطخ دے بچیاں دا شاگرد بناؤن نال کیہ تعلق اے؟ کیہ تُسی کدی بطخ دے بچیاں دا ٹولا سَیر لئی نکلیا ویکھیا اے؟ بطخ دے بچے اصل وِچ شاگرد بناؤن دا اِک اہم اصول سمجھاؤندے نیں۔ جے تُسی چاہندے او پئی خُدا دا ٹبر دُور تک ودھے تے وفاداری وِچ ودھے، تے شاگرد بناؤن نُوں بطخ دے بچیاں وانگ سمجھو - بالکل اِکو ویلے پیروکار وی بنو تے آگو وی۔

دُنیا وِچ تُسی جِتھے وی ہوو، ایہہ ہمیشہ اِکو جیہا لگدا اے۔

ماں بطخ اگے اگے ٹُردی اے تے اوہدے بچے مگر مگر - اِک اِک کر کے - اِک قطار وِچ۔ ماں بطخ راہ وکھاؤندی اے۔ نِکے بچے پیروی کردے نیں۔ پر جے تُسی ہور نیڑے ہو کے ویکھو، تے تہانُوں کجھ ہور وی ہوندا نظر آوے گا۔ ہر نِکا بچہ اصل وِچ دو کردار ادا کر رہیا اے - بالکل اِکو ویلے:

  • ہر نِکا بچہ پیروکار اے، کیونجے اوہ ماں بطخ دی یاں اپنے بالکل اگے ٹُرن والے بچے دی پیروی کر رہیا اے۔
  • تے، بالکل اوسے ویلے، ہر نِکا بچہ آگو اے، کیونجے اوہ اپنے بالکل پِچھے ٹُرن والے بچے (یاں بچیاں) دی اگوائی کر رہیا اے۔

تے فیر بطخ دا بچہ پیروکار اے یاں آگو؟ اوہ دوویں اے۔

تے ایسے لئی "سَیر لئی نکلیاں" بطخاں دا شاگرد بناؤن نال پورا تعلق اے۔ خُدا چاہندا اے پئی اوہدا ٹبر دُور تک ودھے - تے ایس لئی اوہ توقع رکھدا اے پئی ہر پیروکار آگو ہووے، ہر ایماندار ونڈن والا ہووے، تے ہر شاگرد شاگرد بناؤن والا ہووے - بالکل اِکو ویلے۔

شاگرد تے شاگرد بناؤن والے ہوندیاں ہویاں، جِنہاں جالاں وِچ اسی پھسدے آں اوہناں وِچوں اِک ایہہ غلط عقیدہ اے پئی کجھ وی ونڈن توں پہلاں سانُوں سب کجھ، یاں گھٹ توں گھٹ بہت کجھ، پتہ ہونا چاہیدا اے۔ پر شاگردی اینج کم نہیں کردی۔ شاگرد بطخ دے بچیاں وانگ نیں۔ آگو بنن لئی، اوہناں نُوں سب کجھ جانن دی لوڑ نہیں۔

اوہناں نُوں بس اِک قدم اگے ہونا چاہیدا اے۔ خُدا چاہندا اے پئی اوہدا ٹبر وفاداری وِچ ودھے - تے ایس لئی اوہ توقع رکھدا اے پئی ہر آگو پیروکار وی ہووے، ہر ونڈن والا ایماندار وی ہووے، تے ہر شاگرد بناؤن والا آپ وی شاگرد ہووے - ایہہ وی بالکل اِکو ویلے۔ شاگرد تے شاگرد بناؤن والے ہوندیاں ہویاں اِک ہور جال جیہدے وِچ اسی پھسدے آں اوہ ایہہ غلط عقیدہ اے پئی کوئی بندہ، کِتے نہ کِتے، سب کجھ جاندا اے تے جے اسی بس اوہنُوں لبھ کے اوہدی پیروی کر لئیے، تے ساڈا کم ہو گیا۔ پر شاگردی اینج وی کم نہیں کردی۔

خُدا دی بادشاہی وِچ، صرف اِکو "ماں بطخ" اے جیہدی اسی سارے پیروی کردے آں -- تے اوہ یسوع مسیح اے۔ کوئی مشنری نہیں۔ کوئی پادری نہیں۔ کوئی مذہبی مدرسے دا پروفیسر نہیں۔ صرف یسوع ای ساڈے پورے ایمان دا حقدار اے۔

باقی اسی سارے "عمل وِچ" آں۔ ہمیشہ کوئی نہ کوئی ہووے گا جیہڑا یسوع دے ساڈے توں ودھ نیڑے اے تے جیہدی اسی پیروی کر سکدے آں۔ تے ہمیشہ کوئی نہ کوئی ہووے گا جیہڑا ساڈے توں ودھ دُور اے تے جیہدی اسی اگوائی کر سکدے آں۔ پر ساڈی تھاں جو وی ہووے، ساڈیاں اکھاں - تے ساڈے دِل - ہمیشہ پوری طراں یسوع تے لگے رہنے چاہیدے نیں۔

بائبل وِچ، پولُس نے، جیہنے نویں عہدنامے دا بہتا حصہ لکھیا تے بہت ساریاں پہلیاں کلیسیاواں شروع کیتیاں، صرف ایہہ نہیں لکھیا - "میری پیروی کرو۔" اوہنے لکھیا، "میری پیروی کرو، جیویں میں مسیح دی پیروی کرداں آں۔" پولُس اوہ گل جاندا سی جو ہر تھاں دے بطخ دے بچے جاندے نیں تے جو ہر شاگرد نُوں وی پتہ ہونی چاہیدی اے - خُدا دی بادشاہی وِچ ہر آگو نُوں پیروکار ہونا پیندا اے - تے اسی سارے یسوع دی پیروی کردے آں۔

بائبل وِچ، پولُس نے ایہہ وی لکھیا: "جو تُسی میرے کولوں سُنیا اے… اوہ وفادار بندیاں نُوں سونپ دیو، جیہڑے دُوجیاں نُوں وی سکھا سکن۔" پولُس اوہ گل جاندا سی جو ہر تھاں دے بطخ دے بچے جاندے نیں تے جو ہر شاگرد نُوں وی پتہ ہونی چاہیدی اے۔ خُدا دی بادشاہی وِچ ہر پیروکار نُوں آگو ہونا پیندا اے - تے سانُوں سب نُوں یسوع وانگ اگوائی کرنی چاہیدی اے، دُوجیاں لئی اپنی جان دے کے۔ جے تُسی چاہندے او پئی خُدا دا ٹبر دُور تک ودھے تے وفاداری وِچ ودھے، تے شاگرد بناؤن نُوں بطخ دے بچیاں وانگ سمجھو - بالکل اِکو ویلے پیروکار وی بنو تے آگو وی۔

اپنے آپ توں پچھو

  • شاگردیت دا اوہ کیہڑا علاقہ اے جِہدے بارے تُسی ہور سِکھنا چاہندے او؟(بائبل پڑھنا/سمجھنا، دُعا کرنا، خُدا دی کہانی سُنانا وغیرہ) کیہڑا جی اے جیہڑا تہاڈی سِکھن چے مدد کر سکدااے؟
  • اوہ کیہڑا علاقہ اے جیہڑا تُسی سمجھدے او کے دُوجیاں نُوں دسنا سوکھا اے؟ تُسی کیہڑے جی نُوں دس سکو گے؟

اج ہی زُومی ٹریننگ شروع کرو

ایہہ مکمل طور تے مفت اے، تے تُسی کِسے ویلے وی شروع کر سکدے او—جتھے وی او، اپنی رفتار نال چلو۔

مُفت رجسٹر کرو