tool

3/3 گروپ میٹنگ دا نمونہ

ایہہ صفحہ شیئر کرو

3/3 گروپ (ایہنُوں "تھری تھرڈز" پڑھو) اوہ گروپ اے جیہڑا اپنے اکٹھے ویلے نُوں 3 حصیاں وِچ ونڈدا اے۔ ایہہ طریقہ خُداوند دیاں پچھلیاں ہدایتاں نال وفاداری، رل کے خُداوند دی گل سُنن، تے خُداوند ولوں دِتی گئی ہر ہدایت تے نیڑے مستقبل وِچ عمل کرن دا منصوبہ بناؤن تے دھیان دیندا اے۔

ایہہ 3/3 نمونہ سادہ کلیسیا (یاں گھریلو کلیسیا)، لیڈر شِپ سَیل، یاں برابر دے راہنماواں دی راہنمائی کرن والے گروپ لئی ورتیا جا سکدا اے۔

ایہہ اینج کم کردا اے:

  • پچھے ویکھو - گروپ دے ویلے دا پہلا تہائی حصہ پچھے ویکھن وِچ گزاریا جاندا اے پئی پچھلی واری اکٹھے ہون توں بعد کیہ ہویا۔
  • اُتے ویکھو - گروپ دے ویلے دا وِچکارلا تہائی حصہ پاک کلام، گل بات تے دُعا راہیں خُدا دی حکمت تے راہنمائی لئی اُتے ویکھن وِچ گزاریا جاندا اے۔
  • اگے ویکھو - گروپ دے ویلے دا آخری تہائی حصہ اگے ویکھن وِچ گزاریا جاندا اے پئی ہر کوئی جو سِکھیا اوہنُوں کیویں لاگو کرے تے اوہدے تے عمل کرے۔

3/3 اکٹھ دا خاکہ

پچھے ویکھو [تہاڈے ویلے دا 1/3]

فکر تے دُعا: ویلا کڈھو تاں جو ہر بندہ کوئی ایسی گل دسے جیہدے لئی اوہ شکر گزار اے۔ فیر ہر بندہ کوئی ایسی گل دسے جیہدے نال اوہ جدوجہد کر رہیا اے۔ ہر بندے دے سجے پاسے بیٹھا بندہ اوہناں گلاں بارے اوہدے لئی دُعا کرے جیہڑیاں اوہنے دسیاں۔ جے کوئی کِسے ایسی گل نال جدوجہد کر رہیا اے جیہنُوں ہور توجہ دی لوڑ اے، تے بعد وِچ رُک کے اوس بندے دی دیکھ بھال کرو۔

نظریہ: رل کے گیت گاؤن وِچ ویلا گزارو تے گیتاں دے بولاں نُوں ایہناں موضوعاں نال جوڑو: خُدا نال پیار کرنا، دُوجیاں نال پیار کرنا، دُوجیاں نال یسوع نُوں ونڈنا، نویں گروپ شروع کرنا، تے دُوجیاں دی وی ایہو کرن وِچ مدد کرنا۔ یاں فیر لوک بائبل دے اوہ حصے ونڈ سکدے نیں جیہڑے ایہہ موضوع بیان کردے نیں۔ حال احوال: ہر بندہ دسے پئی پچھلے ہفتے اوہنے جیہڑے وعدے لکھے سن اوہناں بارے اوہنے کیہ کیتا:

  • تُسی جو سِکھیا اوہدے تے کیویں عمل کیتا؟
  • تُسی جو سِکھیا اوہدی ٹریننگ کیہنُوں دِتی؟
  • تُسی اپنی کہانی یاں خُدا دی کہانی کیہدے نال ونڈی؟

جے اوہ کِسے وعدے نُوں پورا کرنا بُھل گئے یاں اوہناں نُوں اینج کرن دا موقع نہیں مِلیا، تے پچھلے ہفتے دے اوہ وعدے ایس ہفتے دے وعدیاں وِچ شامل کر دینے چاہیدے نیں۔ جے کوئی بس اوس گل تے عمل کرن توں انکار کردا اے جیہڑی اوہنے صاف طور تے خُدا توں سُنی، تے ایہنُوں کلیسیائی تادیب دا معاملہ سمجھیا جانا چاہیدا اے۔

اُتے ویکھو [تہاڈے ویلے دا 1/3]

دُعا کرو: سادگی تے مختصر طور تے خُدا نال گل کرو۔ خُدا توں منگو پئی اوہ تہانُوں ایہہ حصہ سکھائے۔

پڑھو تے گل بات کرو: ایس ہفتے دا حصہ پڑھو۔ ایہناں سوالاں تے گل بات کرو:

  • ایس حصے وِچ تہانُوں کیہ چنگا لگا؟
  • ایس حصے وِچ تہانُوں کیہ اوکھا یاں سمجھن وِچ مشکل لگا؟

ایس ہفتے دا حصہ فیر پڑھو۔

  • ایس حصے توں اسی لوکاں بارے کیہ سِکھ سکدے آں؟
  • ایس حصے توں اسی خُدا بارے کیہ سِکھ سکدے آں؟

اگے ویکھو [تہاڈے ویلے دا 1/3]

عمل کرو، سکھاؤ تے بیان کرو : گھٹ توں گھٹ پنج مِنٹ چُپ چاپ دُعا کرو۔ گروپ دا ہر بندہ دُعا کرے پئی پاک رُوح اوہنُوں وکھائے پئی ایہناں سوالاں دا جواب کیویں دینا اے، فیر وعدے کرو۔ ہر کوئی اپنے وعدے لکھ لوے تاں جو اوہ سمجھ بوجھ نال لوکاں لئی دُعا کر سکن تے اوہناں نُوں جوابدہ رکھ سکن۔ ہو سکدا اے اوہ ہر ہفتے ہر سوال بارے کجھ نہ سُنن۔ جے اوہ کوئی ایسا جواب دسن جیہدے بارے اوہناں نُوں پکا نہیں پئی اوہ خُدا توں سُنیا اے، پر اوہناں نُوں لگدا اے پئی ایہہ چنگا خیال ہو سکدا اے، تے اوہناں نُوں ایہہ دس دینا چاہیدا اے، کیونجے اوس صورت وِچ جوابدہی وکھرے درجے تے ہووے گی۔

  • میں ایس حصے نُوں کیویں لاگو کراں گا تے اوہدے تے کیویں عمل کراں گا؟
  • میں ایس حصے بارے کیہنُوں ٹریننگ دیواں گا یاں کیہدے نال ونڈاں گا؟
  • خُدا چاہندا اے پئی ایس ہفتے میں اپنی کہانی [گواہی] تے/یاں خُدا دی کہانی کیہدے نال ونڈاں؟

مشق: دو یاں تِن بندیاں دے گروپاں وِچ، اوہ مشق کرو جیہڑا کم کرن دا تُسی سوال 5، 6 یاں 7 وِچ وعدہ کیتا اے۔ مثال دے طور تے، کِسے اوکھی گل بات یاں کِسے آزمائش دا ساہمنا کرن دا کردار ادا کرو؛ اج دا حصہ سکھاؤن دی مشق کرو، یاں خُوشخبری ونڈن دی مشق کرو۔

خُدا نال گل کرو: اوہناں ای دو یاں تِن بندیاں دے گروپاں وِچ، ہر رُکن لئی وکھرے طور تے دُعا کرو۔ خُدا توں منگو پئی اوہ اوہناں لوکاں دے دِل تیار کرے جیہڑے ایس ہفتے یسوع بارے سُنن گے۔ اوہدے توں منگو پئی اوہ تہانُوں اپنے وعدیاں تے عمل کرن لئی طاقت تے حکمت دیوے۔ ایس نال اکٹھ مُک جاندا اے۔

اپنے آپ توں پچھو

  • کیہ تُسی 3/3 گروپ تے بائبل سٹڈی یا سمال گروپ جہدا تُسی ماضی وِچ حصہ رہے او (یاں جہداے بارے سُنیا اے) اوہدے وِچکار فرقاں تے غور کِیتا اے؟ جے رہے او تے، اوہ فرق چیزاں گروپ تے کیویں اثر انداز ہون گیاں؟
  • کیہ 3/3 دے گروپ نُوں سادہ کلیسیا سمجھیا جا سکدا اے؟ کیوں یاں کیوں نئیں؟

اج ہی زُومی ٹریننگ شروع کرو

ایہہ مکمل طور تے مفت اے، تے تُسی کِسے ویلے وی شروع کر سکدے او—جتھے وی او، اپنی رفتار نال چلو۔

مُفت رجسٹر کرو